Tedi Malaveci

Tedi Malaveci është kryetar i Dhomës Kombëtare të Përmbaruesve Gjyqësorë Privatë prej vitit 2014. Me një eksperiencë 24-vjeçare si jurist i angazhuar pranë institucioneve shtetërore ose private të fushës së drejtësisë, ka mbajtur funksione të ndryshme drejtuese në shërbimin publik, veçanërisht në drejtimin e shërbimit përmbarimor gjyqësor si privat dhe atë shtetëror.
Përveç ushtrimit të detyrave drejtuese publike dhe në sektorin privat është përkushtuar në profilizimin e legjislacionit që lidhet me Institutin e Ekzekutimit të Detyruar, duke kontribuar në krijimin e një standardi bashkëkohor dhe rregullativ sa i përket projektimit dhe miratimit të akteve ligjore e nënligjore që lidhen me shërbimin përmbarimor gjyqësor privat.
Mban autorësinë e shumë akteve që përdoren sot prej shërbimit përmbarimor shtetëror dhe privat, si: “Manuali i modularëve të unifikuar për kryerjen e veprimeve procedurale përmbarimore”, direktivave, rregulloreve, udhëzuesve apo orientimeve ligjore për përdorim standard ligjor nga përmbaruesit gjyqësorë privatë dhe zyrat përmbarimore.
Përveç titullit të avokatit dhe përmbaruesit gjyqësor privat, është certifikuar dhe si “Trajner profesionist ndërkombëtar” nga një program i dedikuar (ToT) njëvjeçar i qeverisë gjermane realizuar nëpërmjet “Shoqërisë gjermane për bashkëpunim ndërkombëtar”.